எழுதாக் குறிப்பு
முடிவுக்கு வராத காரணங்களோடு
பின்னப்படுகிறேன்
சுமக்கும் கனம் இறக்கும் பிம்பத்தின்
அளவில்
முடிந்துவிடாதபடி முன்னுக்கு வருகிற
தொலைவைக் கழிக்க
ஒரே ஒரு கழித்தல் குறி கிடைக்கும் வாழ்விற்கு
நகர
அனுபவத்தில்
இன்னும் எத்தனை மைல்கள்
*
மீள்தல்
அத்தனை எளிதாய் கைவிடப்பட்டபோது
கண்டுணர்ந்த கைவிளக்கினை
கரை கொண்டு வந்து சேர்க்கிறது
ஆழம்
அழியாது ஏற்றிய அதன் ஒளிக்குள்
மெல்ல சுடர் விடுகிற நினைவின் பாதம்
நடந்து நடந்து
கடல் நிழலைப் பெருக்கி
உருவாக்கும் தனிமைக்குள்
ஒற்றைப் படகொன்றை
நிறுத்தி வைக்கிறது இருப்பு
அலைமோதி அடங்கட்டும்
கரை
*
துளை பூணும் லயம்
வளைந்து
திருகி
வசதிக்கு துளை செய்யும் குரல் உனக்கு
நானதை மனத்தால் கேட்கிறேன்
நீ சொல்ல
விரியும் அர்த்தங்களை சபையேற்றும்
சாதுர்யம்
என்னை உன்னிசை செய்கிறது
உள் அழைத்து
உடன் கடந்து
மூளை மடிப்பின் ரகசியம் படித்து
நீ அறிந்துகொண்டுவிட்ட
என்னை
இசைக்க மறுப்பதின் வழி
ஏன் வதைக்கிறாய்
ஏழு மலை
ஏழு கடல்
அவ்வளவுக்கெல்லாம் மதிப்பாய் இல்லை
என் அன்பு
வதைக்காதே
காலத்தை தானே அதிகாரத்தால் களவாடினாய்
கைவசமென மிச்சமாகிறேன்
காத்திருக்க
மீளும் மனம் எந்தன் மூங்கில் வனம்
*
இப்படியும்
உன்னைப் பற்றிய எண்ணத்திலிருந்து
மீண்டு கொண்டிருக்கிறேன்
என் வசமான உளக் குறிப்பின்
அநேக பக்கங்கள்
உன் அர்த்தங்கள்
திருத்தி எழுதவே தீர்ப்பு
இனி
வழங்கப்பட்டதில் வந்து அமர்கிறது
உன் வசதி
***
ரேவா
மதுரையில் வசிக்கிறார். கவனிக்க மறந்த சொல் எனும் கவிதைத் தொகுப்பு வெளிவந்துள்ளது. மின்னஞ்சல்: revaviews252@gmail.com
