நிருபர் குழு
சென்னை போட்டோ பயன்னல்லே அமைப்பும் ஸ்டூடியோ ஏ-வும் இணைந்து “கனவு மெய்ப்பட வேண்டும்” எனும் ஓராண்டு கால நிகழ்வின் ஒரு பகுதியாகப் பயிற்சி அளிக்கப்பட்ட ஐந்து பெண் புகைப்படக் கலைஞர்கள் தங்கள் ஆக்கங்களை தட்சிண சித்ராவில் காட்சிக்கு வைப்பார்கள்.
தேர்வு செய்யப்பட்டக் கலைஞர்கள் –
புவனேஸ்வரி – சேலம் மாவட்டத்தைச் சேர்ந்த இவர். ஒரு எளிய குடும்பத்தில் பிறந்து, ஒரு டேட்டா எண்ட்ரி நிறுவனத்தில் வேலை செய்து வந்தாலும் நிழற்படத்துறையை கனவாகக் கொண்டிருந்த இவர், ஃபெலோஷிப் நிகழ்வுக்கு தேர்வு செய்யப்பட்டுள்ளார்.
தனா ஷக்தி – அடிப்படையில் கவிஞரான இவர். நான்கு கவிதைத் தொகுப்புகள் வெளியாகியுள்ளன. நிழற்படத்துறை மீதான ஆர்வம், அவரது கவிதைகளையே நிழற்படமாக்க முடியுமா என்கிற கேள்விக்கான விடையாக ஃபெலோஷிப் நிகழ்வுக்கு தேர்வு செய்யப்பட்டுள்ளார்.
கிருஷ்ணகிரியைச் சேர்ந்த மதுப்பிரியா, பயோகெமிஸ்ட்ரியில் துணைப் பேராசியராக வேலை பார்த்தவர். ஊரடங்கு காலத்தில் தனக்கு ஈடுபாடு இருந்த நிழற்படக் கலை மேல் உந்துதல் பெற்று, முழுமையாக தன் மனம் விரும்பிய துறைக்குள் தன்னை தகுதிப்படுத்திக் கொண்டார். இவருக்கும் கனவு மெய்ப்பட வேண்டும் ஃபெலோஷிப் வழங்கப்பட்டுள்ளது.
சாந்தினி, இது தான் தன் துறை எனத் தீர்மானம் செய்தவர். அதிலும் தனித்துவமிக்க குழந்தைகளுக்கான நிழற்படகலைஞராக வரவேண்டுமென்று அவ்விதமே தன்னை தகவமைத்துக் கொண்டவர். இத்தகைய ஆர்வத்தோடு பெருநகரங்களில் வசிக்காத ஒருவர் தன்னை முழுமையாக ஈடுபடுத்திக்கொள்வது பெரும் நம்பிக்கை அளிக்கிறது. இவரும் அந்த ஐந்தில் ஒருவர். இவர் தன் துறையிள் மிளிர்வார் என்பதில் சந்தேகமேயில்லை
ரேகா விஜயஷங்கர், தக்ஷிணசித்ரா எனும் அருங்காட்சியத்தில் துணை நூலகராகப் பணிபுரிபவர். கலை, கலைப்பொருட்கள் சார்ந்து இவர் ஏற்கனவே தொகுத்து வைத்திருக்கின்ற ஆவணங்கள் மிக முக்கியமானவை. இயற்கையும் பெண்ணும் என்கிற தொகுப்பில் தற்போது அவர் சேகரத்தில் இருக்கின்ற நிழற்படங்கள் விரைவில் காட்சிப்படுத்தப்பட உள்ளது. உலகளவில் கவனம் பெற்ற நிழற்படத்தொகுப்பின் வேறொரு காலவரிசையை அவர் கள ஆய்வு செய்து ஆவணப்படுத்திவருகிறார். இது ரேகாவின் உழைப்பை அடுத்த நிலைக்கு எடுத்துச் செல்லும்
அறிவியல், விமானம், ராணுவம் எனப் பெண்கள் தங்களை நிரூபணம் செய்யாத துறைகளே இல்லை. நிழற்படக்கலை தற்காலப் பெண்களுக்கு மிகவும் சவாலான துறை தான் என்ற போதிலும் இவர்கள் தங்களை நிரூபித்துக் கொண்டிருப்பவர்கள். தங்களது திறன்களை மெருகூட்டவும் புதிய வாய்ப்புகளைப் பெற்றுத்தரவும் உதவுகின்ற, இந்த சென்னை போட்டோ பயன்னல்லே மூன்றாம் பதிப்பில் ஃபெலோஷிப் பெற்றுள்ள ஐவருக்கும் எமது வாழ்த்துகளைத் தெரிவித்துக் கொள்கிறோம்.
