தற்குறிப்பேற்ற அணி
1.
தொடுதல்
முடிச்சிடப்பட்ட உடைகளின்
இறுக்கத்தை அறிந்து
அவிழ்த்திட பிரயோகிக்கும்
பலத்தை கணக்கிட அல்ல.
முண்டி நிலம் பிளக்கும்
துளிர்ப்பின் அன்பது.
*
தொடுதல்
வேட்டைக்கான
காம வனத்தின்
கதவை தள்ளுவதற்கானதல்ல
அன்பெனும் நிலத்துள்
பற்று கொள்ளும் வேர்.
*
தொடுதல்
நீர் அடித்து நீர் விலகும்
பிரியத்தின் விளையாட்டு.
கயமையோடு கவ்விக்கொள்ளும்
காமத்தின் தாகமல்ல.
*
தொடுதல்
பறத்தலின் இறகொன்று
அலைந்தாடி நிலம் அடைதலின்
தாய்மை ஸ்பரிசம்.
…
2.
தழுவுதல்
அகத்துள்
மூடிக் கிடக்கும் விதைகளை
மொட்டுவிடச் செய்யும்
நீரோட்டம்.
*
தழுவுதல்
அம்மணம் கொள்வதற்கான
அச்சாரமல்ல.
மிதந்து கிடக்க
பிணைவன்பு பிறப்பிக்கும்
பறவையின் இறக்கை.
*
தழுவுதல்
இரு துளிகள்
இணைவு கொண்டு
ஒரு துளியாகும்
விந்தை.
*
தழுவுதல்
மரங்களில் பற்றிக்
கிடக்கும் கனிகளின்
சுவையமுதம்.
*
தழுவுதல்
நிலத்தின் மீது
நீர் உலாவும்
குளிர்மையின் பகிர்வு.
*
தழுவுதல்
தன்னில் மறைதல்
தன்னை மறைத்தலென
நிலவிற்கும் மேகத்திற்குமான
விளையாட்டு.
*
தழுவுதல்
நாவைத்
தொடும் மது
உமிழ்நீருக்கு ஊட்டும்
போதையின் மயக்கம்.
…
- ந.பெரியசாமி – na.periyasamy@gmail.com
